A SUNGA OM THUTE

Editorial Laikhung pan

The Silent Period

Jesu hun sungin LST Lui genkholhna a tangtungte

Editorial Laikung pan

Zion Tangko hawm a 8 veina ciangah hong tun Topa a min thang ta hen.

A kimu theilo Pasian a kimu thei mibangin hong paina thu hangin a minthang ngeilo ding a minthan lawh tampi om hi.

Mary: Jesu suahna ding in a kizang numei nu ahihna hangin numei khempeuh lakpan thupha ngah nungak (Lk.1:28), a hampha pen, thupha ngah pen nu (Lk.1:48); naupai gil leh a kitep kha nawi khempeuh sungpan ahampha pen (Lk.11: 27),cih Jesu hangin hamphatna Mary in hong ngah thei hi.

Bethlehem: Judah gam sungah khuata (neu) mahmah khat hi mah taleh, Jesu (messiah) a suahna hangin Bethelem khua nangawn in minthan lawh liang hi (Mic 5:2). Tuni dongin Christmas a kibawl simin Bethlehem khua ah pawi zang dingin mi apai (khualmi) tam pen hi ci in kiciam teh hi.

December: Jesu suah lungdam na pawi lianpi December 25 ni in kibawl ahihna hangin, December kha in min nei in, vang nei in, kum khat in kha 12 sungpan in December in vang nei pen hi, Jesu suah kha ahihna hang ahi hi.

Santa Claus: Christmas hong tunma deuh Dec 24 ni sim in mizawngte tungah letsong hawm kawikawi ahi Saint Nicholas hi a, Dutch pau tawh hong kizang ahi Santa Claus, Christmas hun ah letsong hawmkhiapa (Father of Christmas zong a ci om hi) in Jesu suahna hangin Santa Claus limgol mahmah khamul nei, naupangte maingap dingin omdan a siam na-ngawn in minthan lawhliang hi.

Mawhnei mi: Mawh nei mi khat in ama sungah Jesu suaksak hi leh mawhnei mi kici nawnlo in mi siangtho cihna ngahta hi. Lamhilh aksi hong tang nawnlo dinga, Lai siangtho leh ih Pasian thugen gente pen lamhilh aksi hi in, ih lungsim sungah Jesu suaksak ciat ding hi hang. Jesu hoihna in mimal tungtawnin leitung khuavak hong suak ding hi.

　

AISIANGTHO LUI LEH A THAK KIKAL THU (The Silent Period)


BC 400-1 AD: LST lui kamsang nunung pen Malakhi pan kum 400 sung Topa in Israel mite kamsang, mang, leh lim khatpeuh tungtawnin amite tungah kilakna nei nawnvetlo hi. Tua ahih man in silent period ci in zong kiciamteh hi. Tung lampan in hopihna a om nawnloh ciangin, kipawlna tuam tuam hongpiangte a nuai ah ensuk ni:

Sadducee kipawlna: Laisiangtho lui sungah hih Sadducee kipawlna a omlam kigelh kha ngeilo in, Jesu hun ciangin thahat mahmah khinta uh a, LST lui leh a thak kikal hunsunga kipawlna khat ahihna kilang hi. Hih mite pen siampi lian Zadok suan dingin kingaih sun hi (1Kum.2:35), tua ahih manin Levi minam cihna hi a, a kiliansak mahmahte hipha deuh uh hi. Biakinnpi sung khempeuh amau thuneihna hi a, kilian sak mahmah uh hi. Farisai te tawh a kilamdan mahmah na uh khat ah thawhkikna thu, kha thu leh vantung mite thu a umkei uh hi (Sawl.23:6-10). Tulaitak Judaism te dinmun dan ahi uh hi. Ahizongin, Jesu bawlsiat leh thah ding vai ah Sadducee leh Farisai te kipumkhat mahmah vet uh hi. Biakinn tawh kisai ah vaipuakna neizaw deuhte ahih manun AD 70 kum in Jerusalem leh a biakinnpi a kihaltum ciangin hih Sadducee kipawlna beisiang ta hi.

Farisai kipawlna: Galdo hunsunga minthang Macabees hunlai (135-104 BC) in John Hyrcanus kici hunsunga hong piangkhia kipawlna khat hi in, a khiatna pen "separated ones" "teltuam kipawnna" cih khat hong piangkhia in, thukham tawh kisai zawdeuh thunei kipawlna hongsuak hi. Jesu hunciangin thahat mahmah ta uh hi. Jesu in a huat mahmah ka galte, mualtan suan, a cih zawzen te ahi uh hi.


Herod pawlte: Herod a nu Hebia mi hi in, amah pen Kahbia khat ahihna leh Rome gam-meng Judea uk ahihna tawh Judah minamte a mai-etna in BC 20 kum in Jerusalem biakinnpi puahphat sak ngei a, Jesu hun ciangin kum 46 bang sawtta in, nasia mahmah hi (Jn.2:20). Jersualem a kihal tum AD 70 kumciang dong Herod innkuante in Judea gam uk uh hi. Herodians a kicihna tua hang ahi hi.

The Galileans: Judea mite adingin gamvai ah a limpan mahmah kipawlna hi in Galilean kipawlna cih zong LST lui leh a thak hunsungin hongpiang khat ahi hi. Ei leh ei ki uk ding cih a han ciam phadeuh kipawlna hi a, Pilat in hua mahmah ahih man in thatang hat thu tawh tampi thatsak ahih manin the Galilean ten lungphona nasiatakin nei uh hi (Lk.13:1,2). Galilee te pen Jew veve ahih uh hangin, Judea gamlamte tawh a pau awkaih uh tampi kilamdang hi.


The Sanhedrin (Donghu kipawlna): Supreme Court vai tawh kisai thuneite ahi uh hi. Gamvai thu khat peuh vaihawm ding akisam a om leh a kisap dungzui in a kimukhawm ziauziau thei kipawlna min khat ahi hi. Makai lutang 70 pan 72 phathei uh hi: president pen Siampi lian pen, siampi semthei 24, laitheite leh sitnite, uliante (lai theilo aitang palaite) cih bang ahi uh hi. HIh kivaipuakna pen Moses hun (Gam.11:16,17) ahih kei leh Jehoshafat hun (2Khang.19:8) pek pan kipan hikha dingin ki ummawh hi.

LXX: BC 250 hun lai in Izipt kumpi Ptolemy II hunlai in Jew minam Greek scholars 70 (a taktak in 72) te in Thuciam Lui Hebia pen Greek lai tawh Izipt khuapi Alexandria ah hong letkhia uh hi. Hih pen scholar 70 te letkhiat a cihnopna LXX (L=50, X=10) min vawh uh a, Septuagint zong kici hi. Original LST panin a letkhiat masa penpen Jesu hun ah lim mahmah uh hi.


JESU hunsungin LST Lui genkholhna a tangtungte


1. Nungak siangtho in tapa nei ding Is.4:13; Mt.1:22, 23).

2. Mong neilo David tokhom tawh kizom ding hi (2Sam.7:11,12; Late 132:11; Jer.23:5; Lk.1:31-32)

3. Hih Tokhom in a tawntung in a kip ding hi (Dan.2:44; 7:14,27; Micah.4:7; Lk.1:33).

4. Emmanuel kici ding hi (Is.:14; Mt.1:23).

5. Ama mai ah kamtai khat a om ding hi (Is.40:3-5; Mal.3:1; Lk.1:76-78; 3:3-6; Mt.3:1-3).

6. Bethlehem khua ah suak ding (Micah 5:2; Lk.2:4-6.

7. Mipilte in biading uh a, letsong zong apia ding uh hi (Late 72:10; Is.60:3,6,9; Mt.2:11).

8. Egypt ah tawmvei sung om ding hi (Gam.24:8; Hos.11:1; Mt.2:15).

9. A suahna khua ah naupang kahna om ding (Jer.31:15; Mt.2:17,18).

10. Nazareth khuami kici ding hi (Is.11:1; Mt.2:23).

11. Hangsanna tawh kidim ding (Late 69:9; 119:139; Jn.2:13-17).

12. Kha tawh kidim ding (Is.11:2; 61:1,2; Late 45:7; Lk.4:18,19).

13. Natna namkim a damsak ding hi (Is.53:4; Mt.8:16,17).

14. Gentiles mite tung ah hehpihna a nei ding hi (Is.9:1,2; 42:1-3; Mt.12:17-21;4:13-16; Lk.2:32).

15. Gentehna tampi tawh thu a hilh ding hi (Is.6:9,10; Mt.13:10-15).

16. Ama mite mah in a sang zokei ding uh hi (Is.53:3; Late 69:8; Mt.21:4,5).

17. Gualzawhna tawh lano tungtuang in Jerusalem ah a kimuak ding hi (Zech.9:9; Mt.21:4,5).

18. Naupangte in a pahtawi ding uh hi (Late 8:2; Mt.1:16).

19. A ki nawlkhin Innkiu suang hiding hi (Late 118:22,23; Mt.21:42).

20. Na lamdang tampi a bawl hang in kuamah in asang tuankei ding uh hi (Is.53:1; Jn.12:37,38).

21. A lawmte ngiat in dangka 30 tawh a zuak ding hi (Late 41:9; 55:12-14; Zech.11:12-13; Mt.26:14-16,21-25).

22. Gimna thuakpa ahi hi (Is.53:3; Mt.26:37,38).

23. A nungzuite in a nusia ding hi (Zech.13:7; Mt.26:31,26).

24. Pang bet leh cil phih simmawhna a thuak ding hi (Is.50:6; Mt.26:67; 27:26).

25. A kizuakna sum tawh leibel neipa lo/huan ki lei ding hi (Zech.11:12,13; Jer.18:1-4; 19:1-4; Mt.27:9,10).

26. Ban-zak in khaina tawh hotkhiatna pulak ding (Pai.6:6; Jn.19:18,30).

27. Mi gilote kikal ah khaina a thuak ding hi (Is.53:12; Mt.27:38; Mk.15:27,28; Lk.22:37).

28. Lenggah tuithuk a tulh ding uh hi (Late 69:21; Mt.27:34,48; Jn.19:28-30).

29. A khut leh khe te sik tawh a kilhcip ding uh hi (Late 22:16; Zech.12:10; Mk.15:25; Jn.19:34,37; 20:25-27).

30. A puante kuan ngahding cih a theihna ding un lai-ai asaan ding uh hi (Late 22:18; Lk.23:34; Jn.19:23,24).

31. A galte in umcih in a zahko ding uh hi (Late 22:7,8; Mt.27:39-44; Mk.19:28).

32. A dangtaak ding hi (Late 22:15; Jn.29:28).

33. Pasian khiangah a kha a ap ding hi (Late 31:5; Lk.23:46).

34. A guhte a ki tan kei ding hi (Late 34:20; Pai.12:46; Jn.19:33-36).

35. Teipi tawh a sutpa uh a en ding uh hi (Zech.10:12; Jn.19:37; Mt.27:36).

36. Mihau khat bang in kivui ding hi (Is.53:9; Mt.27:57-60).

37. Sihna pan in a thokik ding hi (Late 16:10; Mt.28:2-7).

38. Vantung ah a kilato ding hi (Late 24:7-10; Mk.16:19; Lk.24:51).