Zomi Pentecostal Church Conference 2017 hunnuamtak in ki zangh thei hi. Biakpiakna man khit ciangin Annek tawh kizom in, tua khitteh Conference Meeting ki zomsuak aa, Revival Service tawh zong ki zomsuak toto hi.

Theihding:
Minute 1:20 khitteh hih Video ki en thei pan hi.
Zomi Pentecostal Church ah 2017 kumthak hunnuam zatna Video in ki koih hi.

Nipi Nisim
Biakpiak hun: 2:00pm-5:00pm

 
Zomi Pentecostal Church biakpiakna ah Pasian kha in hong om pih den in, nuam kisa mahmah hi.
Siamah Liannu Lasakna hi
Sia Zam Khan Sang in  Kawlgambup UPC sawlna hang tawh hong pai Rev.Dr. Cin Za Lian in  Zomi Pentecostal Church ah Ordination a piakna hi.





A SUNG AOM THUTE
 Editorial Laikhung pan
  Kroger sai neipa Tangthu
 A Etteh Huai Picinna
 Vantung Gam Tawhtang
 Siampi Minam
 US Nuntakna ah

Editorial Laikhung pan

Zion Tangko hawm 12na ciang hong tun Topa hoih hi. January pan April (kha li) ciang dong hong kalsuanpih Jesu ih Pasian in minthanna tangta hen. 2016 sung kumpha, hamphatna, kamphatna, lawhcinna, daupaina kum dingin kumthak thungetna ah ih ap ahi hi. Ih dahna pan in ih lungdam theihna ding, ih hehna panin ih daihsak theina ding, ih lungkhamna panin ih khamuan theihna ding leh ih lawplohna panin lawpna ih ngahkik theihna dingin bang lampi om a, kua tungah kinga a, kua in hong awlmawh pen ding hiam? Thuthak a theinuam mi khat in thu manpha tampi a kaihkhop kisam a, thu limci a munuam khat in thu siangtho a kaihkhop kisam hi.



Hoihna, nuamna, leh lawpnate, malzon ding kisam:

1. Ih nuntakna sungpan ih ngaihsutna hong piang khia hi.
2. Ih ngaihsutna in ih maipuak kilangsak hi.
3. Mi ih muhzia in kua ih hi hiam cih kilangsak hi.
4. Ih mit a hoih leh ih muhdan hoih hi.
5. Ki bawlphat a ut mi khat in, na khempeuh tungtawn in phattuamna mukhia hi.
6. Ka ta aw siatna khempeuh pelh in la, bang hoih hiam cih kan inla sem in. (1Thess.5:9-23).

BARNEY KROGER TANGTHU (JAN 24, 1860-JUL 21, 1938)

Nu leh pa pianna:  Mary Schlebee leh John Henry Kroger (German gam pan US immigrants) te sung pan in Jan 24, 1860 ni in Cincinnati, Ohio khua ah suaka, unau 10 lak ah a 5na hi.

A Naupan lai: A nu leh pate in innkuan nuntakna a haksatna hangin a tapa uh Barney Kroger pen kum 13 aphak ciangin nasem dingin zang uh hi. The Great Northern and Pacific Tea Co., leh the Imperial Tea Co. te van inn khat khit khat ah zuak kawi kawi in tua bang nasepna tawh a khangto mi khat ahi hi.

Manager suak: The Great Northern and Pacific Tea Co. leh the Imperial Tea Co. te in Kroger pen a sepna khat peuh ah citak sa in, muantak sa uh ahih manin manager dingin zang uh hi. Amah pen hong lawhcin mahmah ciangin, store neite in Kroger haza in hong zang nuam nawnlo uh hi. Korger tawh a kithuah nawnloh uh ciangin haksatna tampi The Great Western Tea Co. te in hong tuak uh hi. Mi company ah a sep hun sungin $ 372 (tulai $ 9400 tawh kikim) sum khol hi.

Kroger Sai Min: Ama min “KROGER” puasak in 1902 kum in van namkim zuakna sumbuk hong kipan hi. A kammal thupi khat “Be particular. Never sell anything you would not want yourself” (Hih sitset in. Nang mahmah in na deihloh nam khempeuh zuak kei in.”

Tennessee State ah: 2008 kum bei lam in Kroger store lianpi amasa penFarragut, TN, a nihna pen 2009 kum kipat kumin Thompson’s Station, TN gei ah, a thumna pen Gallatin, TN ah March 11, 2010 in kihong hi. Anihna ngah: 2014 kum in America gamsung supermarket khempeuh pan  vanzuak khia a tampen (Walmart), a nihna (Kroger) total assets 30.49 billions tawh ngah hi. 2016 kumbul in nasem 431,000 nei hi.

Thalakna: A nu leh pa thumang, kum 13 aphakciangin a nu leh pa tawh nasem khawm, a sepna peuh ah citak hi. $372 tawh sumbuk zuak kipan a, a sihma in millionaire suak hi, a sih khit ciangin a suan-le-khak te na hoih nusiat hi.

ETTEH HUAI PICINNA

Upa leh Siate ading
1. Thu haksa tampi za den mah leh tuate in a kha tha kiamsak lo ding hi.
2. Lungdamna hangin nuamlua lo dinga, lungkhamna hangin thanem pahlo ding hi.
3. A thanem ni leh a thalawp ni ah a mai suah dan kilamdang sakpah lo ding hi.
4. Pawlpi sungah a picing leh picinglo, a lawp leh lawplo, a piangthak/thaklo omkhawm cih telsiam dending hi.

Member te adding
1. Ama nopsakna sangin picinna lam hahkatzaw ding hi.
2. A lawpna sangin siangthona thupi sak zaw ding hi.
3. Makai suak thei nam ding ka hi cih nuntakna tawh nungzui hoih kisin ding  hi

VANTUNG GAM TAWHTANG (THE KEY OF HEAVEN)

LST simna ding tangte: Mt.16:18-19; 28:19-20; Mk.1:3-5; 16:15-18; Lk.24:47,49; Jn.16:8-12; Sawl.1:5,8; 2:1-41; 8:517; 10:1-48; 19:1-7; Rom.6:3-4; Gal.3:27; Efe.4:5; Fil.2:912; 1Pit.3:20-21; 1Jn.5:6-8; etc.

Jesu in Suangpi tungah a pawlpi phut hi (Mt.16:18; 1Kor.3: 10-11; 10:1-4; Efe.2:20-22, Jesu in hih Suangpi (Petra) tungah ka pawlpi ka lam ding hi” ci hi (tua Suangpi  in Jesu ahi hi). Tua pawlpi pen vantung gam tung dingte a genna hi a (tulai pawlpi minte genna hilo hi). Vantung gam tunna dingin a phuh-sa pawlpi (Suangpi, kongpi, pumpi) honna tawhtang kua tungah ap citciat hiam ensuk ni:
Piter tungah ap hi: Jesu (Suangpi) in nang Piter (suangneu, Petros) tungah vantung gam kong honna tawhtang kong ap hi (Mt. 16:18-19) ci hi. Lei ah na honte van ah kihong dinga, lei ah na hente van ah kihen ding hi ci hi. Sawltak dangte tungah a piakei hi, a sanggam James leh Judah te, Paul tungah zong hilo hi, Pope leh tulai pastor khat peuh tungah zong a pia kei hi, ahizongin, Piter tung bek ah pia hi.

Piter in bang ci hon hiam ensuk ding hi hang: Khasiangtho na ngak un (Lk.24:47,49; Jn.16:8-12; Sawl.1: 4,5,8): Vantung pan vangliatna (KST) angah mateng un ngak ding hi a, thuneihna a piak hangin zatpah theih hinailo hi. Amaute in KST a tun masiah ngak takpi uh hi (Sawl.1-2Chs). Vaikhakna leh thupiak tampite gen a, ahizong in KST ngak-sak phot hi (Jn.16:12; Sawl.1:8). Thu um mite KST tawh a kidim khit uh ciangin Piter in bangci bangin van-gam tawh-tang (Key) zangin kong honna hong nei hiam cih (Sawl.1:8 a tangtunna) en ni:

Jerusalem leh Judea (Sawl.2-7chs): Pentecost day ni in KST tawh kidim ciat uh himah leh tangkona (phuisamna) Piter in hong nei in, sawltak dangte in thukimpih uh hi (Sawl 1:14). Piter in Jerusalem leh Judea gam sunga dingin kong honna hong nei hi.

Samaria gam (Sawl.8 ch): Thugen masa pen Filip hi in (upa khat hi a, sawltak zong hilo hi). Jesu min tawh thu um mite tuiphum napi KST a ngah omlo hi (Piter in kong honna nei nailo!). Hih thupiang a zak uh ciangin Jerusalem panin Piter leh John te pai in, Jesu min tawh tuiphumna a tangkhinte tungah khut nga in thu a ngetsak khitciangin amaute in KST ngah uh hi. Piter in Samaria khua/gam adingin kong honna neikhin ahih manin Filip in Mangpa a tuiphum (Sawl.8:35-39) hun ah Piter kisam nawnlo hi.Siampi Ananias in Saul a tuiphum hun ah Piter kisam nawnlo hi, bang hang hiam cih leh Judea leh Samaria gam ih cih ciangin Jews mi khempeuh huam ahihna ahi hi.

Gentail te tungah (Sawl.1:8; 10:1-48): Leimong dong adim Gentail mite sung pan Kornelius leh a innkuan un Jesu a up uh ciangin KST ngah in Jesu min tawh ki tuiphum uh hi. Hih munsan ah Vantung gam kong tawhtang a hong pen Piter mah ahi hi. Leimong dong in a teng mite tungah kong honna Piter in neikhin ahih manin Paul missionary sepna leh a pawlpi phuhna khempeuh ah Piter a va kihel hamtang ding kisam nawnlo hi.

Thukhupna: Jesu thugente pen Jesu zia leh tong bangin tangtung a, tulai pawlpi deihkaih danin tangtung lo hi. Jesu phuhsa a pawlpi tungah Piter in a kong hondan pen: Jesu si, kivui, thokik, amah Khazih ahi hi, Topa ahi hi, Pasian ahi hi, mihing mawhna in amah that hi, tua ahih manin na mawhna uh hong ki maisak theihna dingin Jesu min tawh ki tuiphum un, tua in Khasiangtho ngahna ding kongpi hi a, “thu um mite, Jesu a siangtho mah bangin siangtho nuntakna na phak mateng delh in”  cih ahi hi (1Pit.1:15-16).  A nungta upna pen a nungta thuzuihna ahi hi. Hih in Pasian hehpihna hi a, gamtatpha hang hilo hi Efe.2:8).


SIAMPI MINAM

Levi Minam: Jacob tapa a thumna Levi hi a, siampi zaa ngahpah samlo in, apa samsiatna a ngahpa ahi hi (Pian.49:5-6). Levi suan-lekhak pen nampi thum in kikhen hi:

1. Gershom—biakbuk vante a kem cing ding
2. Kohath—Moses, Aaron, Samuel, siampi nasep a sem ding: Aaron suante bek siampi lianpen hithei ding
3. Merari—Innlam siamte, biakbuk tawh kisai leh biakinn lam siamna Topa in  tuam piak deuh hi.

Siampi minam (OT): Pasian khat biakna nusia in Izipt pasian phawkna tawh Bawng milim mai ah Israel mipi a mawh laitakin, mawhna panin a kisikkik Levi minam bupin Pasian leh Moses thu ka mang ding uh hi, cihna tawh siampi minam hong suak uh hi (Pai.32:26; Gam.8: 6,16; Thkna 10:8-9; 18:1)

Siampi Lianpen minam: Aaron leh a suan-le-khak bek in siampi lianpen hihna ngah uh hi (Pai.28:1; 30:10). Levi mi nam khempeuh siampi a hih hangin biakbuk sunga siangtho penpen mun ah Aaron suan bek lut thei hi.

Siampi minam (NT): Thukhunthak hun ah Jesu sunga thu um khempeuh siampi leh kumpi minam dingin hong bawl hi (2:9-10). Levi minam khem peuh siampi nam ahih hangin siampi lian pen a tuam in omlai hi. Siampi lian pen suan-le-khak a om hangin a duty sep hun ding uh sehtan neisak uh hi.

Tua mah bangin tuhun ah thu um khem peuh siampi nam ih hih hangin, siampi nasep a semdingin Ordination ci in pawlpi in a sehbawl pen LST dan ahi hi. Siampi Lian pen taktak in Jesu ahi hi
(Heb.7:26; 1Tim.2:5).


USA NUNTAKNA AH

1. Ph neihloh phamawh hi.
2. Email zat theih hamtang thupi hi.
3. Computer zatdan a bulpi teng beek theih ding kisam mahmah hi.
 4. Internet line (ph, computer, etc) neih hamtang hoihzaw hi.
5. Bill khempeuh a hunman in pia den in.
 6. Appointment mangngilh ngeikei in.
7. Biakna mantakin hanciam in (1/10, anpal, piakkhiatna).
8. Na pianpih kampau innsungah zang hamtang in.
9. Gam ah na nutsiat sanggam/u leh nau te tawh hoihtakin kizom den in.
10. Pu le pa ngeina hoihte mangngilhna/ nutsiatna gam hilo hi